Luk 23 | ATA | STEP | La sou ane'i latala e mipita ne, miavuti sou milutunoxu milaixu noxou Pilato.

a 23:7Luk 3:1

b 23:29Luk 21:23

c 23:30Ose 10:8; Pal 6:16

d 23:34Lex 22:18; Ais 53:12

e 23:35Lex 22:7-8

f 23:36Lex 69:21

g 23:45Eva 6:19-20, 10:19-20

h 23:56Mul 20:10; Lap 5:14

Luke 23

1 La sou ane'i latala e mipita ne, miavuti sou milutunoxu milaixu noxou Pilato. 2 Milaixu noxou, la ane'i misokou sou mitelo vaikala noxou aloxo 'o, “Nexi texalisou mitema 'o ne lexe mu'oxovulaulaunu xavutalai'a ta mitema no tualasixe. Xe Anu muvikala lexe mamu sou talea lamoli ulai noxou Kaisari, xe Anu molu muvikala lexe anu Kalisito e tatananu tuala.”

3 La sou Pilato mutali'isou Iesu aloxo 'o, “Nini ne, tatananu tuala noxi'a ta Iutaia ne?”

La Iesu mukolinu aloxo 'o, “Ani, anu aloxo nini nelemolu nesi.”

4 Mukalu, la sou Pilato muvikala lamana mulai noxi'a ta tatilasi'a ta aili'i ilo'a ta mitema tavu'alo ne aloxo 'o, “Eni axalisou tava'u susu vile sou talosou itema ane 'o navunavu no anu uasi.”

5 Ia ane'i mi'olosou vaikalasi lexe, “Anu musoko mulosi'a ta mitema lavulavu no xalee lia tila ne Xalilaia, la sou mune'e ne Iutaia mo mune'e muxali avile lai 'o. La sou Anu muavutinoxu ta mitema opone'i sou i'oto'oto.”

6 Pilato mulomusi'a mivikala aloxo ne, la mutali'isi'a lexe anu itema ne sie Xalilaia. 7 ^aXe anu mulavusou lexe Iesu ne muxolu no anu saxila'u noxou Elodesi, la anu mupalusou mulai noxou, xo anu kalumo a muxolu ne Ielusalemu no anu voxo ane ne.

8 No mine Iesu mulai muxali xe Elodesi mumaisou, la anu mu'osa manina. Xo mulomusou a'alosou mimii ane anu mu'oxo'oxonu, la mumasaxa lexe umaisou Iesu ne maxuveeni musuku mo mumasaxa lexe umaisou sosovo se'i e Anu uo'xonu kalumo. 9 La sou anu mutali'isou no anu tali'i tapiena, ia Iesu ukolinu uasi. 10 La sou ta tatilasi'a ta aili'i ilo'a ta mitema sou lapuloto ane mitulutulu ne, mitelo anaxa'a pekia'u noxou. 11 Mukalu, la sou Elodesi ilo'a ta mitema sou 'oto'oto noxou mi'oxomaulanu mo mimolovila'isou sou mitaa tokolomo lailaixe noxou, ka io sou mipalusou mulivu mulai noxou Pilato. 12 Tatei, la Elodesi ilou Pilato ne, imolosilane'i ngatongato'o. Ia no anu voxo ane nesi, la ilou mivaitami laixe.

13 La Pilato mu'avali'a ta tatilasi'a ta aili'i ilo'a ta tatila noxi'a ta Iutaia mo ta mitema e mine'e mipita, 14 la muvikalane'i aloxo 'o, “Ngingi ngene'enu itema 'o noxilo sou ngevikala lexe anu mu'oxovulaulaunu xavutalai'a ta mitema sou iavutinoxu 'oto'oto. Ia eni etali'i masianu laixe sou mimii e ngevikala lexe Anu mu'oxonu no iengi 'o, la axalisou tava'u susu vile sou talosou itema ane 'o navunavu no anu uasi. 15 Mo Elodesi kalumo ne anu uxalisou susu tava'u vile noxou uasi, la sou anu mupalusou mulivu mune'e noxixe 'o. Nenge telavusou lexe itema ano 'o, u'oxo susu vile e umomomo sou eni avikala lexe anu usoli no anu uasi. 16 Aloxo ne, la sou eni apuapuasousi, ka io sou alulusou ulai.”

18 Ia ane'i ta mitema mikeinoxu anaxa'a toxoxa'a lexe, “Naxexeenu itema ane ne mo usoli! Ia nalulusou Valavasi une'e noxixe!” 19 [Xo Valavasi ne, anu itema vile e muavutinoxu 'oto'oto vile noxi'a ta mitema sou isaxila'u tuala tila 'o, la muve'ave'a ta mitema. La sou ane'i mitatuxu muxolu no nano no taasou navunavu.]

20 Pilato mumasaxa lexe anu ululusou Iesu mo ulai, la sou anu mulinga la, sou lexe ilulusou Iesu. 21 Ia ane'i mi'ava'ava toxoxa'a la aloxo 'o, “Ngalilixu no ovu valautu! Ngalilixu no ovu valautu!”

22 Alaxu tatalusou la, la anu muvikalane'i aloxo 'o, “Anu itema ano 'o mu'oxonu susu ma'ia manina? Eni axalisou tava'u susu vile sou tava'u usoli no anu uasi. La sou eni apuapuasousi, ka alulusou mo ulai.”

23 Ia ane'i miuolotete manina sou milinga pekia'u ulai noxou Pilato lexe anu ulilixu no ovu valautu. Ane'i milinga pekia'u aloxo ne, la sou Pilato mulomuxa'a 24 sou mumulinu masaxa noxi'a. 25 La sou itema e muavutinoxu 'oto'oto mo muve'ave'a ta mitema misoli, ne ane'i mitatuxu no nano no taasou navunavu ne, anu mululusou aloxo ane'i ta mitema milingau. Ia mu'italonu Iesu mulai no avo'a ta mitema sou 'oto'oto sou lexe i'oxonu mii ma'ia noxou no anu masaxa noxi'a ta mitema ne.

Ane'i Mililinoxu Iesu no Anu Ovu Valautu

(Mat 27:31-44; Mak 15:21-32; Ioa 19:17-27)

26 La sou ta mitema sou 'oto'oto milaixu Iesu sou lexe ililixu no ovu valautu, la mitetelisou itema vile ualasou lexe Saimoni e tualasou ne Kilene, sou mutavulenu ovu valautu noxou Iesu, io Iesu mumuamua'i mumuli sou ilou milai. Anu molu no tuala vile 'alai ne Ielusalemu, ia mune'e mupolopepeene'i sou lexe u'unalai no tuala tila. 27 La ta mitema tavu'alo mimulinu Iesu, la ta sema se'i itatama tatila sou imumulinu Iesu. 28 La Iesu muxiu vaxa noxi'a io muvikalane'i aloxo 'o, “Ngingi ta sema sie Ielusalemu, mamu sou ngatatamasilo, ia lexe ngingi ngatatamasinge ngongi'a ta 'ilinge.” 29 ^bXo ili'i, xe voxo vile uxali, la ngingi ngavikala lexe, ‘Lataua ualusi'a ta sema ane imomomo sou ivo'o keakea uasi xe ualusi'a ane'i ane xaluasi'a ta 'ili'a uxalixu keakea uasi mo ualasi'a ane'i ane susune'i, ia imomomo sou isusune'i ta 'ili'a uasi.’ 30 ^cNo anu voxo ane ne, la ane'i ivikalanu la'ola'olu 'o lexe, ‘Ngingi ngalu'e mo ngasu'asixe!’ mo ivikalanu laxalaxa'ilu 'o lexe, ‘Ngingi ngalu'e mo ngatalumeixe!’ 31 Xo lexe itema u'oxonu mimii ane ne no mine loxo ovu xale'asi io, la mii ma'ia uxali no mine ovu uxalo?

32 Ioxe, no voxo ane ne, la ta mitema sou 'oto'oto mino'a ta mitema tamei sou 'ilixo masua kalumo milaixi'a lexe ive'a ilo'a Iesu. 33 Ia ane'i milaixa'a xe mixali no tani vile ilemo lexe Itema Xavananu, la ane'i mililixu Iesu no ovu valautu. Mo ane'i ta mitema sou 'ilixo masua ne kalumo, mililixa'a ilou, la mililixu vile no avolu tema xe vile no avolu ae. 34 ^dLa Iesu muvikala aloxo 'o, “Mamilo, nini naxiu tumalineu 'ilixo ane ane'i i'oxonu noxilo 'o, xo ane'i ilavusou lexe mii ma'ia ane ane'i i'oxonu ne uasi.” Ia ane'i mi'oxonu vila'i vile sou mimila'anu tokolomou Iesu noxi'a vilevilesi.

35 ^eIo, ta mitema mitutulu sou mimamalei, ia ta tatila noxi'a ta Iutaia mimolovila'isou la mivikalanu aloxo 'o, “Anu mupamauline'i ta mitema va'ava'axu, ia lexe anu Kalisito noxou Lataua e Anu musosovosou lexe Anu na'u, la Anu molu upamaulinu.”

36 ^fLa ta mitema sou 'oto'oto kalumo mimolovila'isou, ka mine'e 'alai noxou sou lexe ilosou uaini ane sixula. 37 La ane'i mivikala aloxo 'o, “Ia lexe nini tatananu tuala ne Iutaia, la nini mene napamaulineni.”

38 Ane'i mililixu Iesu no ovu valautu, la mikaukavu vaikala lamana vile misakiinu teitexi noxou Iesu kisou aloxo 'o, “Itema ane 'o ne, Anu tatananu tuala noxi'a ta Iutaia.”

39 Ia vile noxi'a tamei e mililixa'a ilo'a Iesu ne, muvikala masua mulai noxou Iesu aloxo 'o, “Lexe nini Kalisito, la napamaulinenge nenge'a!”

40 Ia ane vile mulomusou mine muvikala loxo ne, la mukaitolonu sou muvikala aloxo 'o, “Nini namama'u noxou Lataua uasi? Nenge nenge'a, teno'u navunavu iou vilesisi. 41 Ia navunavu noxinge nengei 'o, anu umomomo no anu 'ilixo e nenge nengei te'oxonu. Ia itema ane 'o, u'oxonu 'ilixo vile masua uasi.”

42 La anu muvikalanu Iesu aloxo 'o, “Iesu, lexe nini nalai xe naxali no tuala noxou Lataua, la naxavutalaleli.”

43 La Iesu muvikalanu aloxo 'o, “Eni avikalaneni manina lexe vaimomo 'o, la nenge nengei taxolu no opo loxotolo e Lataua uxolu no anu.”

Iesu Musoli

(Mat 27:45-56; Mak 15:33-41; Ioa 19:28-30)

44 Xe ili'i no mine aso anu asou ukulupa, la isivoxo mutaasou xalexalee tuatuala mukalusi, mole aso iou tatalu no 'olo'olovoxo. 45 ^gXo aso lamanaxu ne, mukalu xe lavalava e mulili no nano no tani tila noxou Lataua ne, mukakaa tamomolu teitexi mulai mupe'e no lia. 46 La Iesu mu'ava toxoxa'a aloxo 'o, “Mamilo, eni a'italonu uleeleli ulai no avone.” Anu muvikala aloxo ne mukalu, la mulapulapu ulu sou musoli.

47 Ioxe, itema tila sou uulaxune'i ta mitema sou 'oto'oto itemaxu ta'uve mumaisou mii ane muxali noxou Iesu, la mu'itinu Lataua ualasou, la muvikala aloxo 'o, “Manina musuku lexe itema ano 'o ne, Anu mulapu manina.” 48 Ia ta mitema tavu'alo ane mine'e mipita sou misasaxisou mimii e mi'oxo noxou Iesu ne, la ane'i tane'ixu mo mitamasou toxoxa'a, ka milivu milai no taasi'a. 49 Ia ta mitema tavu'alo ane milavusou Iesu ilo'a ta sema ane mimulinu Iesu ilo'a me'a ne Xalilaia ne, mitutulu no paxa, io mimaisou mimii ane ane'i mi'oxonu noxou ne.

Iosepu Mu'asixu Iesu

(Mat 27:57-61; Mak 15:42-47; Ioa 19:38-42)

50 Xe Iesu musoli mukalu, la itema vile ualasou lexe Iosepu mulai noxou Pilato sou mulingau Iesu vasimolu. Anu vile noxi'a ta tatila sou ipotosou tu'utu'umaxu noxi'a ta mitema mo anu itema vile laixe mo mulapu manina. Ia anu u'osasou vaikala ane ta menexu misakiinu sou mi'oxonu noxou Iesu ne uasi. Ia anu molu no tuala ne Alimatia no xalee lia tila ne Iutaia mo anu uxomaiou saxisaxila'u noxou Lataua une'e. 53 Pilato muvikala ee noxou Iosepu, la sou anu mulai mulaxalixu Iesu vasimolu teitexi no ovu valautu sou mulu'e no lia. Mukalu, la sou muno'u lavalava vile keakea sou mukupoonu Iesu vasimolu no anu. Mukupoonu mukalu, la sou mutavulenu vasimolu mulailixu no lulu vile no lavo'o taxanu. Io lulu ane ne i'asixu itema vile no anu uao. 54 Xo voxo ane ne, anu voxo sou lalaxii sou voxo Tavuna. Mo anu a 'alai sou voxo Tavuna usoko.

55 Ta sema ane ilo'a Iesu me'a ne Xalilaia, mine'e ne mimulinu Iosepu sou milai mimaisou lulu xe mimaisou Iosepu lexe u'asixu Iesu a loxovaa. 56 ^hAne'i mimaisou mukalu, la ane'i milivu milai no tani sou milalaxiinu lamalasile ilou lexa ane tuma'u lailaixe. Ia ane'i mima'ila no voxo Tavuna sou mimulinu lapuloto sou voxo ane ne.